A risa volverá encher as rúas e teatros da cidade herculina do 23 de abril ao 3 de maio, coa sexta edición do Encontro Mundial de Humorismo (EMHU). O público poderá descubrir novos espectáculos, estreas absolutas e grandes nomes da comedia estatal e internacional.
Baixo a dirección artística de Luis Piedrahita, o EMHU 2026 promete non deixar un momento sen sorriso. Entre as primeiras confirmacións do cartel destacan nomes como Xosé A. Touriñán, Álex Clavero, Bárbara Grandío, Carolina Iglesias, Eva Hache, JJ Vaquero ou Victoria Martín, que traen estreas absolutas e espectáculos inéditos en Galicia.
Durante once días, A Coruña converterase na capital internacional da comedia, acollendo monólogos, stand-up, humor físico, acrobacias e propostas de circo cómico que desafían o xeito tradicional de facer rir. Entre as estreas máis esperadas están Contra todo pronóstico, de Bárbara Grandío; Pintando a mona xuntos, de Miguel Lago e Roberto Vilar; e CASO, de Rober Bodegas. Tamén se poderá ver por primeira vez en Galicia El show de Mentira y Traición, de Carolina Iglesias e Victoria Martín, así como os novos traballos de Omayra Cazorla, La Forte, Finzi Pasca e Yunez Chaib.
O EMHU mantén tamén as citas colectivas que xa se converteron en clásicas, como a gala ‘Chisteria Colectiva’, que xunta veteranos e novas xeracións da comedia nunha gran celebración do chiste, a improvisación e a música. Ademais, propostas internacionais e de humor físico, como Piensa en Wilbur ou Corta el cable rojo, aportan unha diversidade de linguaxes cómicas que converten os teatros e rúas da cidade nun escenario vivo e inesperado.
As funcións dividiranse entre o Teatro Colón, Afundación, Palexco e o Palacio da Ópera, permitindo que cada público constrúa a súa propia ruta de risas.
Ademais das entradas individuais, haberá tamén catro tipos de abonos que estarán dispoñibles a partir do 18 de decembro en emhu.es e Ataquilla.com, garantindo acceso a este gran encontro internacional do humor que xa se perfila como cita imprescindible da primavera coruñesa.
