A xira de Amoriños chegou ao seu fin esta fin de semana na Coruña, onde o espectáculo de Xosé A. Touriñán e David Perdomo se despediu dos escenarios cunha serie de funcións en Palexco. Un peche que pon fin a unha primeira etapa iniciada en novembro e que percorreu varios teatros galegos ao longo do inverno.
Amoriños botou a andar o pasado mes de novembro como unha proposta completamente nova para Touriñán e Perdomo. Tras o éxito de Corentena e Corentena · Game Over, os dous creadores regresaron ás táboas cun espectáculo centrado no territorio máis imprevisible de todos: o amor. Citas tolas, paixóns imposibles e personaxes que nunca deberían xuntarse (pero que se xuntan igual) artellan unha especie de ‘First Dates’ á galega, onde o humor salvaxe convive coa emoción e coa improvisación.
A xira arrincou en Noia e percorreu cidades como Vigo, Vilagarcía de Arousa e Santiago de Compostela antes de desembocar na Coruña, onde o espectáculo se despediu cunha fin de semana intensa en Palexco. Ao longo do percorrido, Amoriños foi enchendo auditorios e sumando funcións ante o gran interese do público, consolidándose como unha das propostas máis seguidas da tempada.
Un dos trazos que definiu esta primeira etapa foi o carácter vivo do espectáculo, que foi collendo forma función tras función, alimentándose da resposta do público e do xogo escénico entre os intérpretes. A improvisación converteuse así nun eixo central da proposta, facendo que cada pase fose distinto ao anterior e reforzando a sensación de estar ante un encontro único e irrepetible.
A complicidade entre Touriñán e Perdomo, sumada á implicación activa da platea, acabou por definir unha xira marcada polo ritmo, a sorpresa e a risa compartida. En cada función, o público pasou de espectador a cómplice, formando parte dun espectáculo que se constrúe no aquí e agora e que fai do encontro o seu principal motor.
Con textos e dirección asinados polos propios protagonistas, Amoriños contou co asesoramento de dirección de Noemí Rodríguez e coa dirección de produción de Laura Canto, ademais do equipo técnico habitual das producións de Ainé. Un traballo colectivo que sostivo unha proposta escénica coidada, dinámica e aberta ao xogo, na que o humor e a emoción conviven en equilibrio.
O peche desta primeira xira non supón tanto unha despedida como a celebración dun camiño compartido. Amoriños remata así unha etapa inicial marcada polos cheos e pola resposta calorosa da xente, deixando aberta a porta a novos encontros e confirmando que, mesmo nas súas versións máis absurdas, o amor segue a ser un motor infalible sobre as táboas.
