Schmetterlinge estará no Teatro Gostner de Nuremberg do 14 de novembro ao 7 de decembro. A proposta, resultado dunha colaboración galega-alemá, explora as emocións humanas conectando ambas culturas.
A cidade de Nuremberg será o escenario de Schmetterlinge, unha innovadora produción teatral dirixida por María Torres e Gonçalo Guerreiro da compañía Elefante Elegante. En colaboración co Teatro Gostner, a obra adapta a novela Os bicos feridos da autora Anna R. Figueiredo, explorando emocións e conflitos universais a través dun enfoque visual e poético.
Schmetterlinge (“bolboretas” en alemán) segue a vida de Olivia, unha muller nada en Alemaña de pais emigrantes galegos que regresa ao seu país natal para traballar no fogar de Lisa, unha médica forense. A conexión inesperada entre Olivia e Samuel, fillo dunha actriz en busca do éxito, desencadea unha serie de eventos que exploran temas de dó e reconciliación.
Co seu característico estilo, Elefante Elegante combina teatro físico, danza e artes visuais. A compañía, con base en Culleredo, gañou un lugar destacado no panorama teatral europeo polo seu enfoque estético e a súa capacidade para comunicar a través do corpo e o movemento. Schmetterlinge é un exemplo da constante exploración de Elefante Elegante en temas de relevancia social e existencial, presentado cunha estética que recorda á poesía visual e plástica.
