Rematamos o ano cun dos actores máis recoñecidos polo público galego. O receptor do noso cuestionario fixo centos de personaxes no teatro, no cine e na televisión.
Evaristo Calvo (A Coruña, 1961) é actor, director, autor teatral e outras tantas cousas. Entre elas lector, amante das sobremesas e seguidor de rutinas. Comezou no teatro a mediados dos anos setenta e ten traballado en series de televisión como ‘Pratos Combinados’, ‘Mareas Vivas’ ou ‘Rapa’. Agora tocoulle contestar o cuestionario Fóra do drama…
- A miña sobremesa favorita é… un arroz con leite, aínda que tamén che podería dicir queixo con marmelo ou coulant. A miña sobremesa favorita sempre é en plural: sobremesas.
- A rutina que máis odio é… ningunha porque son superfan das rutinas. Paréceme parvo odialas. Se as odias, déixaas.
- Unha obra que me impactou foi… ‘Alfanhuí’, de Rafael Sánchez Ferlosio.
- O meu nome favorito é… Iemanjá, a deusa do mar.
- A felicidade é para min… saber esquecer.
- Se non me dedicara a isto, sería… labrego.
- Dos meus inimigos quero… que aprecien a miña insignificancia.
- Hoxe levo nos petos… poucos cartos.
- Quero que reciba este cuestionario… Xoel Fernández.
