A mostra trae teatro, presentacións literarias e obradoiros do 25 de xuño ao 8 de xullo.
A programación inclúe máis de 50 eventos entre espectáculos teatrais, presentacións literarias e obradoiros e desenvolverase do 25 de xuño ao 8 de xullo.
A Mostra Internacional de Teatro Cómico e Festivo de Cangas (MITCFC) cumpre 40 anos, converténdose neste 2023 na capital do teatro do 25 de xuño ao 8 de xullo. Un total de 14 días nos que a vila do Morrazo se enche de teatro de auditorio e de rúa, mais tamén de charlas, presentacións literarias e exposicións ao redor das artes escénicas e do humor.
O programa da 40ª edición inclúe 5 estreas absolutas e 3 coproducións. As estreas absolutas da mostra son Entrega en man, de Contraproducións, unha comedia negra do dramaturgo inglés Martin McDonagh adaptada ao galego por Cándido Pazó; A mesa, da Escola de Teatro de Cangas, con texto de Clara Gayo, Zé Paredes e Carlos Santiago dirixido por Sonia Rúa; Hoxe si!, de Sempre Arriba, un espectáculo en linguaxe clown con acrobacia aérea e, sobre todo, moito humor; Glamping, de SU.MA, unha peza de teatro xestual, música, acrobacia aérea, danza e swing en clave de clown; e Menú do día, na que o colectivo #ChamizoBelloVila tece unha historia que compara odio e disidencia, tristeza e aceptación. A primeira creación deste colectivo transita entre as violencias que sofre o colectivo LGTBIQ+. Entrega en man e Menú do día son, ademais, coproducións da Mostra de Cangas xunto a ¿Qué es el agua?, unha peza de La Soledad (Cataluña-Arxentina) inspirada na obra do escritor David Foster Wallace que toma o mar como escenografía e como banda sonora. En Cangas, o espectáculo representarase no espazo da Lagoa da Congorza, en Punta Balea, un acto que servirá para reclamar a recuperación desta contorna.
Estreas en Galicia
A MITCFC ten programadas 4 estreas en Galicia. Unha delas é El avaro, unha obra do dramaturgo francés Molière que pon en escena a compañía andaluza Atalaya cun elenco de oito actores e actrices entre as que se atopa Carmen Gallardo. Tamén se verán por primeira vez na nosa comunidade In petto, unha creación na que a compañía belga Okidok redescubre o traballo dun dúo de pallasos non verbal; Contracciones, de Producciones Come y Calla (Madrid), protagonizada por Candela Peña e Pilar Castro e cunha temática que explora a invasión crecente das grandes compañías na intimidade dos seus empregados; e Camino del Paraíso, da compañía estremeña Guirigai Teatro, unha comedia satírica que reflexiona sobre as actitudes dos peregrinos a Santiago de Compostela nunha época de bruxerías e supersticións.
Torneo de dramaturxia
O Torneo de Dramaturxia de Galicia, unha iniciativa pioneira da mostra que conta coa colaboración da asociación DramaturGA, consolídase na súa sétima edición como unha aposta firme da MITCFC para dar a coñecer a dramaturxia feita en Galicia, creando un nexo directo entre público e creadores.
Esther F. Carrodeguas, de ButacaZero, será a mestra de cerimonias dun combate escénico entre Deborah Vukusic (actriz, escritora e directora), Ana Abad de Larriva (actriz e creadora escénica), Manuel Cortés (dramaturgo e poeta) e J. L. Baños de Cos (docente teatral e dramaturgo). Os catro usarán a palabra, os ritmos, os conflitos, as accións e os silencios para conseguir o voto do público.
Recoñecementos a Tanxarina e Amelia Tiganus
O Premio Xiria ao Labor Teatral desta 40 edición da Mostra de Cangas é para a compañía galega Tanxarina, que este ano tamén celebra 40 anos de traxectoria artística. Con este galardón, a mostra recoñece a traxectoria comprometida co teatro de monicreques e de obxectos, que dignificaron e popularizaron cun traballo exquisito e en constante evolución.
O Premio Mulleres en Acción recae neste 2023 na escritora e activista feminista Amelia Tiganus, de quen a organización destaca a súa valentía, compromiso e determinación en combater a trata e a explotación sexual de mulleres e nenas.
Pódese consultar a programación completa e mercar as entradas na web da Mostra de Cangas.
