Remata o 2024 e facemos balance do que foron estes 12 meses nas artes escénicas galegas. Estreas, entrevistas, festivais, novas compañías, consolidación de propostas, récords de público…
Neste ano que estamos a piques de despedir, sacamos dous novos números en papel e continuamos contando o que ocorre sobre as táboas galegas coa curiosidade e a mirada de quen senta na butaca por vez primeira para somerxerse nos mundos e historias que constrúen para nós; o público.
Un ano dá para moito, e un ano contando o que acontece nos escenarios do noso país é difícil de resumir nun texto como este, pero imos intentalo igualmente.
O 2024 comezámolo inaugurando unha das seccións máis exitosas da revista, o Fóra do drama. Este pequeno xogo naceu coa vontade de coñecer mellor ás e ós protagonistas do teatro galego mediante un cuestionario que se van pasando mes a mes. Deste xeito, vaise construíndo unha cadea cuxos elos non sabemos a onde nos van levar nos seguintes meses. Comezou Lucía Veiga e rematou Inés Salvado Gontad, pasando por Evaristo Calvo, Xoel Fernández, Marta Costa, Fernando Tato, Pepo Suevos, María Roja, María Costas, Humy Donado, César Cambeiro e Roberto Leal. Paloma Otero é a encargada de comezar esta cadea que contruiremos ao longo do 2025 coa que seguiremos descubrindo teimas, gustos, obsesións…
Unha teima nosa foi a de construír unha base lectora mediante o Entre Táboas —ao que podes suscribirte de xeito gratuíto aquí—, no cal comezamos a publicar avances dos contidos da revista en papel, entrevistas, crónicas e textos nos que exploramos, en forma de listas, curiosidades e anécdotas do teatro galego. Nestes textos, coñecimos onde lles gusta comer aos equipos técnicos e artísticos cando están de xira por Galicia, cal foi o debut dalgúns dos grandes talentos das nosas táboas, descubrimos algunhas películas que naceron dun espectáculo teatral, indagamos nos primeiros grandes éxitos do teatro galego, fomos a lugares pouco convencionais para facer teatro e tamén soubemos de 10 teatros galegos que xa non existen. Este último, foi o contido máis lido e compartido neste 2024, o que nos trouxo tanta alegría como nostalxia deixaron os teatros que xa nunca poderemos visitar.
Estivemos tamén moi atentas e atentos ao que aconteceu nos testivais galegos que, un ano máis, consolidaron uns públicos que non perden a oportunidade de gozar con grandes producións, estreas e propostas orixinais e arriscadas feitas para espazos concretísimos. Corufest, a MIT de Cangas, a MIT de Ribadavia, o Festival Atlántica, Escenas do Cambio, Danza no Claustro, o Castelo Conta, o FIOT de Carballo, o Comediártiko ou o D10! foron algúns dos que puidemos contar o máis destacado. Un ano máis, tamén visitamos o Festival de Almada e fixemos algunha outra escapada a Portugal.
Este 2024 quixemos seguir contando de preto e na voz dos protagonistas as novidades do teatro galego, mais non só. As nosas entrevistas procuraron non centrar todo o contido na actualidade, senón ir máis aló, comprender as traxectoiras, as motivacións, as expectativas e, dalgún xeito, coñecer mellor a creadoras e intérpretes sen necesidade de que a novidade fíe as conversas.
Asi, convesamos con Marta Doviro, Sara Incera, Esther F. Carrodeguas, Paula Carballeira, Sergio Zearreta, David Perdomo e Touriñán, Sara Fandiño, Iria Ares e Xoán Carlos Mejuto, Tamara Canosa, Belén Pichel, Fran Sieira e Miguel de Lira.
Tamén repasamos os 40 anos do Centro Dramático Galego a través das súas profesionais, visitamos o Teatro Jofre de Ferrol, coñecimos o labor de Teatro Muxicas, a escena do teatro universitario galego ou indagamos na creación das máscaras de Os vellos non deben de namorarse.
No ano que comeza, queremos seguir vivindo e contando o noso teatro, sumaremos dous novos números en papel á colección de Táboas —este ano sacamos o número 4 e o número 5— que podes mercar aquí; e queremos tamén chegar a máis xente cada día.
O noso desexo é simple: seguir sendo felices no mellor lugar do mundo; o teatro.
Os datos do Observatorio da Cultura Galega sitúan o teatro galego nun lugar preocupante, ocupando as últimas posicións en canto a relevancia por debaixo de música, literatura, audiovisual e mesmo institucións culturais.
O informe publicado polo Consello da Cultura Galega sitúa o traballo dos actores e do seu espectáculo teatral por diante doutros nomes e iniciativas tamén relevantes como a obra Iribarne, o Centro Dramático Galego, a Mostra de Teatro de Ribadavia ou as compañías Sarabela e Chévere.
